جس طرح ہمارے اسلاف نے متحد ہوکر انگریزوں کو بھگایا تھااسی طرح آج ملک کی سالمیت کو برقرار رکھنے کیلئے متحد ہونا وقت کی اہم ضرورت ہے:سابق وزیر عارف نسیم خان

زاہدآزاد جھنڈانگری

ممبئی،سماج نیوز: ممبئی کے قلب میں واقع سینڈ جوڈے ہائی اسکول گراونڈ90فٹ روڈ ساکی ناکہ (اندھیری ایسٹ) میں دوستی ایجوکیشنل ،سوشل اینڈویلفیئر سوسائٹی کے زیر اہتمام اسکولوں میں تعلیم حاصل کرنے والے بچوں کی رہنمائی کیلئے’’فروغ تعلیم نسواں‘‘ کے عنوان سے ایک ورکشاپ ہوا۔ جس میں ماہرین تعلیم نے بچوں اور ان کے سرپرستوں کے سامنے تعلیم کی افادیت کو بیان کیا۔ گزشتہ دنوں سابقہ روایات کو برقرار رکھتے ہوئے ضرورت مند بچیوں کو سلائی مشین ،اور پرائمری سے کالج میجر تعلیم بچوں کو’تعلیمی کٹ‘ اورضرورت مندوں کو ضروریات کو پورا کرتے ہوئے سوسائٹی کے صدر جمال خان نےجشن ہندوستان کے21ویں عالمی مشاعرہ کے موقع پر کہا کہ ’مشاعرہ کا انعقاد کرنے کا مقصد تعلیم کو فروغ دینا ہے، اس منچ سے ہر برس غریب اور نادار بچوں اور طالبان علوم کو ہر ممکن مدد دی جاتی ہے۔ خواتین کو روزگار سے جوڑنے کے لئےانہیں مفت میں سلائی مشین دی جاتی ہے تاکہ مستقبل میں وہ اپنے گھر کے اخراجات کا بار اٹھاسکیں۔

مشاعرے کے صدرسابق وزیر برائے اقلیتی امور و اوقاف عارف نسیم خان نے عوام سے خطاب کرتے ہوئے کہا کہ ہمارے اسلاف نے ایک جٹ ہو کر اپنی اتحاد کی طاقت سے انگریزوں کو اس ملک سے بھاگنے پر مجبور کیا اور ہمیں آزادی دلائی۔ ایک مرتبہ پھر ہندو، مسلم، سکھ، عیسائیوں کو ملک سے بے روزگاری، تعصب پسندی، گندی سیاست اورملک کی سالمیت کو برقرار رکھنے کے متحد ہونا وقت کی اہم ضرورت ہے۔جمال خان نے کہا اس سے قبل کے مشاعروں میں نیپال کی نمائندگی نیپال کے معروف شاعر مولانا زاھدآزاد جھنڈانگری مشرف اعلیٰ جامعہ خدیجۃ الکبریٰ جھنڈانگر نیپال برابر شریک ہوتے رہے ہیں ۔انہو ں نے تعلیم نسواں پر تعلیم کے میدان میں بہت کام کیا ہے۔ میں آپ لوگوں سے اپیل کرنا چاہتا ہوں کہ اگر آپ بہت غریب ہیں دو روٹی کھاتے ہیں تو ایک روٹی کھائیں مگر اپنے بچوں کو پڑھائیں،اگر آپ صاحب ثروت ہیں تو کسی ایک بچے کو گود لے لیں اور اس کو پڑھائیں تاکہ ہمارے بچے دوسرے بچوں کے شانہ بشانہ ترقی کرکے اس ملک کی تعمیر و ترقی میں اپنا کردار نبھائیں۔ مشاعرے میں جوہر کانپوری، شبینہ ادیب، لتا حیا،پونم وشوکرما، یوسف رانا،حسن بلرامپوری، نردیش افی،اجمل عارف،جعفر بلرامپوری، شاد اکبر پوری،اشہد اعظمی،اختر الہ آبادی،یاسر اعظمی، نصیب اللہ بستوی، امرائ القیس وغیرہ نے اپنے کلام سے سامعین کو محظوظ فرمایا۔ نظامت کا فرائض رجب شیروانی نے ادا کیا۔اس مشاعرے میں مہمان کی حیثیت سے شریف خان، نفیس خان، قادر ہاشمی، نشاط خان، سنیل دوبے، غالب شیخ ،احسان راعین، مولانا عظیم اللہ، امراللہ خان، اشتیاق چودھری ،اٹاوہ سےخصوصی طور پراشرف خورشید(جنرل سکریٹری کانگریس مائنارٹی سیل اتر پردیش)،فتح محمد کے علاوہ سینکڑوں کی تعداد میں عوام الناس نے شریک ہو کر مشاعرے کو کامیاب و کامران بنایا۔ یہ مشاعرہ مجموعی طور پر بہت کامیاب رہا۔