نئی دہلی ،سماج نیوز:آل انڈیا کانگریس کمیٹی ( اے آئی سی سی ) کے نوجوان لیڈر اور دہلی میونسپل کارپوریشن ( ایم سی ڈی ) کے میڈیا کو آرڈی نیٹر سید عدنان اشرف نے اپنے بیان میں دہلی کے عوام سے کانگریس کو ووٹ دینے کی اپیل کی ۔ انہوں نے کہا کہ دہلی کی ترقی کیلئے دہلی کے عوام کے پاس یہ بہترین موقع ہے اور اس موقع کا بھر پور استعمال کرنا چاہئے ۔ انہوں نے کہا کہ بی جے پی اور ریاستی حکومت کی رسہ کشی میں دہلی کے عوام کو تین بڑے بڑے کوڑے کے پہاڑ تحفے میں ملے ہیں اور دہلی میں فضائی آلودگی ریکارڈ توڑ رہی ہے ۔ انہوں نے کہا کہ آج گلی محلوں میں جگہ جگہ کوڑے کے ڈھیر نظر آتے ہیں جس سے تعفن پھیلتا ہے ۔ عدنان نے کہا کہ آج دہلی کے لوگ سابق وزیر اعلی آنجہانی شیلا دیکشت کے زمانے کو یاد کر رہے ہیں اور مجھے امید ہے کہ وہ دہلی کی ترقی کیلئے کانگریس کو ووٹ دیں گے ۔انہوں نے مزید کہا کہ جمہوریت میں ووٹ سب سے بڑی طاقت ہے اس لئے جو ووٹ ڈالنے کے قابل ہے وہ سب سے پہلے اپنا ووٹ ڈالے ۔