زاہدآزاد جھنڈانگری

جھنڈا نگر ؍نیپال، سماج نیوز سروس: قرآن کریم کتاب ہدایت اور قوم وملت کے لئے عظیم سرمایہ ہے۔اس کی تعلیمات کو عام کرنے کی آج کے اس پرفتن دور میں سب سے زیادہ ضرورت ہے ۔ آج اس کے علمی انکشافات کو واضح کرنے کی سخت ضرورت ہے۔اس کے ذریعہ امن وآشتی، اخوت وبھائی چارہ ، قومی یکجہتی کو فروغ حاصل ہوگا۔ آپسی منافرت ،تشددپسندی اور دہشت گردی کا خاتمہ ہوگا ۔ان خیالات کا اظہار جامعۃ الامام محمد بن سعود کے ایک ہونہار طالب علم عزیزم حافظ عبدالله عظمت الله ریاضی نے کیا۔آپ نے مزید آگےکہا کہ ’’وزارۃ شئون الاسلامی سعودی عرب‘‘ کی جانب سے منعقد ہونے والے مسابقہ ء قران کریم ایک عظیم اور مستحسن قدم ہے۔ جس کی جتنی بھی تعریف کی جائے کم ہے۔ انہوں مزید کہا کہ آج ضرورت اس بات کی ہے کہ ہم حقیقی حامل قرآن بنیں ،زمانہ ہماری رہنمائی کامنتظرہے۔ اگرہم قرآن کی انسانیت نواز تعلیمات کو صحیح معنوں میں اپنالئے تو انسانیت کی کایا پلٹ سکتی ہے اور ہماری قوم شاہ راہ حقیقت سے روشناس ہو سکتی ہے اور اس کی برکتوں سے مستفید بھی ہوسکتی ہے۔ قرآن کریم کی تلاوت کرلینا یااس کو حفظ کرلینا سعادت کی بات ہے مگر اس کو اپنی رگ وپے میں بسانے اور اس کی تعلیمات کے مطابق زندگی گزارنے ہی سے اس کا حق ادا ہوسکتاہے۔آپ لوگوں نے اپنے سینوں میں قرآن کریم کی دولت کو محفوظ کیا ہے اس کے لیے آپ مبارکباد کے مستحق ہیں۔ میں آپ کو آپ کے والدین کو،آپ کے اساتذہ کو اورآپ کے محسنین مدارس کو مبارکباد دیتاہوں اور ان کا شکریہ اداکرتاہوں کہ ان کی محنت ولگن سے آپ نے یہ مقام حاصل کیاہے اوریہ ان کی نئی نسل کے تئیں فکرمندی کا ثبوت ہے۔آپ حضرات اپنے مقام ومرتبے کو پہچانیں اور اللہ جل شانہ کے انسانیت کے نام پیغام ودستور یعنی قرآن کریم سے وابستگی پرفخر محسوس کریں ۔ہم جملہ ذمہ داران اور تمام شرکاء مسابقہ وحکم حضرات کا تہہ دل سے اس میں شرکت کے لیے شکریہ ادا کرتے ہیں اوربارگاہ رب دوعالم میں دعاگو ہوں کہ وہ ہم سب کو قرآن کریم کی تعلیمات پرعمل کرنے اورکماحقہ اس کی خدمت انجام دینے کی توفیق ارزانی فرمائے۔ آمین