روپیہ کی گراوٹ پر وزیر خزانہ کا عجیب و غریب بیان، کہا ’’روپیہ کمزور نہیں، یوں کہیں کہ ڈالر مضبوط ہو رہا ہے‘‘
نئی دہلی، سماج نیوز: ڈالر کے مقابلے روپیہ میں جس تیزی سے گراوٹ کا سلسلہ جاری ہے اس سے یہ بات کہی جاسکتی ہے کہ کچھ مہینوں کے اندر سنچری مکمل کرلے گا۔ دن بہ دن روپیہ میں گراوٹ کے نئے ریکارڈ قائم ہورہے ہیں۔ اس وقت ایک ڈالر کی قیمت 82 روپے 42 پیسے تک پہنچ گئی ہے۔ اس صورتحال کو قبول کرنے اور اس کی بہتری کے لیے اقدامات کرنے کے بجائے مرکز کی مودی حکومت اس حالت زار کو فائدہ مند قرار دینے کی کوشش کر رہی ہے۔ اس طرح کا ایک بیان امریکہ پر دورے پر گئیں مرکزی وزیر خزانہ نرملا سیتارمن نے دیا ہے، جس میں انہوں نے روپیہ کی قدر میں کمی پر عجیب و غریب دلیل دی ہے۔ مرکزی وزیر خزانہ نرملا سیتا رمن اپنے امریکہ کے سرکاری دورے کے دوران واشنگٹن ڈی سی میں میڈیا سے خطاب کے دوران جب صحافیوں نے ان سے روپیہ میں گراوٹ کے سلسلے میں سوال کیا تو ان کا جواب سن کر آپ بھی حیران ہوجائیں گے۔ صحافیوں کا جواب دیتے ہوئے انہوں نے کہا کہ ’’روپیہ کی قدر نہیں گر رہی ہے بلکہ اسے ہمیں اسے اس طرح دیکھنا چاہیے کہ ڈالر مضبوط ہو رہا ہے لیکن اگر آپ مارکیٹ کی دیگر کرنسیوں کو دیکھیں تو روپیہ کی کارکردگی ڈالر کے مقابلے کافی بہتر ہے!‘‘ روپیہ کی مسلسل گراوٹ سے ہندوستان کی مشکلات میں اضافہ ہوا ہے اور کئی علاقوں میں اس کا اثر نظر آ رہا ہے۔ تیل کی قیمتوں سے لے کر روزمرہ استعمال کی اشیاء کی قیمتوں میں اضافہ دیکھا جا رہا ہے۔ روپیہ کی گراوٹ ہندوستان اس حوالہ سے بھی بڑی پریشانی کا باعث ہے کہ ملک بہت سی ادویات بشمول ضروری تیل، برقی سامان اور مشینری درآمد کرتا ہے۔ اگر روپیہ کی قدر اسی طرح گرتی رہی تو درآمدات مزید مہنگی ہو جائیں گی اور آپ کو زیادہ خرچ کرنا پڑے گا۔