نئی دہلی، سماج نیوز: آج ملک بھر میں عید میلاد النبیﷺ نہایت تزک واحتشام کے ساتھ منایا گیا۔ اس خاص موقع پر صدر جمہوریہ ہند دروپدی مرمو، وزیر اعظم نریندر مودی اور راہل گاندھی سمیت اہم شخصیات نے ہم وطنوں کو مبارکباد پیش کی ہے۔صدر دروپدی مرمو نے اپنے ٹویٹر ہینڈل پر لکھا’’پیغمبر اسلامﷺ کے یوم پیدائش میلاد النبیﷺ کے پرمسرت موقع پر میں تمام ہم وطنوں خاص کر مسلمان بھائیوں اور بہنوں کو مبارکباد پیش کرتی ہوں۔ آج ہم سب پیغمبرﷺ کی زندگی سے متاثر ہو کر باہمی ہم آہنگی کے ساتھ ملک کی ترقی کے لیے کام کرتے رہنے کا عہد کریں‘‘۔وزیر اعظم مودی نے ٹوئٹر پر لکھا’’میلاد النبیﷺ کی مبارکباد۔ دعا ہے کہ اس موقع پر ہمارے معاشرے میں امن، اتحاد اور ہمدردی کے جذبے کو مزید فروغ ملے۔ عید مبارک‘‘۔ کانگریس لیڈر راہل گاندھی نے بھی ٹوئٹر کر کے ہم وطنوں کو میلاد النبی کی مبارکباد پیش کی۔ انہوں نے اپنے ٹوئٹر ہینڈل پر لکھا’’عید میلاد النبی مبارک! یہ مبارک موقع سب کے لیے امن، ہم آہنگی، اچھی صحت اور خوشحالی لائے‘‘۔ عید میلاد النبیﷺ ہر سال پیغمبر اسلامﷺ کے یوم کے 12 ربیع الاول کو منایا جاتا ہے، ربیع الاول اسلامی قمری کیلنڈر کا تیسرا مہینہ ہے۔ اس دن مسلمان نماز ادا کر کے حضور اکرمﷺ کو درود سلام پیش کرتے ہیں اور کچھ مقامات پر جلوس بھی برآمد کئے جاتے یں۔
