پرویز یعقوب مدنی

خادم جامعہ سراج العلوم السلفیہ، جھنڈانگر، نیپال

کتاب وسنت کی علمبردار حکومت مملکت سعود عرب پر باری تعالیٰ کا فضل و کرم اور اس کا بے پایاں احسان ہے کہ قیام سعودی عرب کے اولین ایام سے وہ اسلامی تعلیمات کی نشر واشاعت اور فروغ، یتیموں کی دست گیری، بے واوں کی خبر گیری ، غموں میں ڈوبے انسانوں کی غمگساری، لاچار و پریشاں حال انسانوں کا امداد و تعاون، اسلامی مراکز و دینی درسگاہوں کی تعمیر و تزئین وغیرہ جیسے اہم۔امور میں مصروف عمل ہے، مملکت سعودی ہی وہ اسلامی مملکت ہے جسے حرمین شریفین کی خدمت اور نگہبانی و پاسبانی کا شرف حاصل ہے۔ مملکت کے باعزم حکمراں ہمیشہ سے حرمین کی تعمیر و توسیع اس کی ضروریات کی تکمیل اور پوری دنیا سے پہنچنے والے زائرین، معتمرین اور حجاج کرام کو ہر طرح کی سہولت بہم پہنچانے کے لئے ہر ممکن کوشش اور جد وجہد کرتے ہیں۔ فللہ الحمد یہی وجہ ہے کہ مملکت سعودی عرب کے فرمانروا حاکم وقت شاہ سلمان بن عبد العزیز حفظہ اللہ نے سال 2024 کیلئے پوری دنیا سے تقریباً ایک ہزار بڑی شخصیات کو شاہی خرچ پر عمرے کیلئے مدعو کرکے ایک مثالی قدم اٹھایا ہے ۔ پوری دنیا سے منتخب قومی و ملی تنظیموں کے سربراہان ، سیاسی و سماجی اور رفاہی شخصیات، مدارس ومراکز کے با اثر ذمہ داران، میدان صحافت و دعوت میں ید طولی رکھنے والی نابغہ روزگار افراد، منبر و محراب کو زینت بخشنے والے مؤقر خطباء وغیرہم کی یہ خوش بختی ہے کہ وہ ایک صالح شخصیت اور کتاب وسنت پر علمبراد حکومت کے مہمان بن رہے ہیں۔ منتخب اور چیدہ و چنیدہ شخصیات خوش نصیبوں کو سعودی حکومت سے مفت میں ویزہ، ہوائی جہاز کا ٹکٹ ، مکہ مکرمہ، مدینہ منورہ اور دیگر مشاعر مقدسہ کی زیارت، کھانے پینے کی ساری سہولتیں حکومت خادم حرمین شریفین کی طرف سے فراہم کی جاتی ہیں۔ اور منتخب افراد ہر طرح سے پرسکون اور آزادانہ طور پر انتہائی سنجیدگی اور متانت سے عمرہ کے ارکان سے عہدہ بر آ ہوتے ہیں۔

اللہ کا فضل ہے امسال سعودی عرب نے ملک نیپال سے کل دس لوگوں کو یہ اعزاز بخشا کہ وہ اس پروجیکٹ میں شریک ہوکر عمرہ کی سعادت حاصل کریں۔ باری تعالیٰ کا شکر ہے کہ ملک نیپال سے منتخب شدہ افراد عمرہ کے لئے مکہ روانہ ہوچکے ہیں ۔دعا ہے کہ باری تعالیٰ ان کے اس سفر کو آسان بنائے، مملکت سعودی کے حکمرانوں کی اس کاوش کو شرف قبولیت بخشے اور انہیں مزید اسلام اور مسلمانوں کی خدمت کی توفیق ارزانی نصیب کرے اور معتمرین کے عمرہ کو قبول فرمائے۔ آمین