’ہمیں ہر حالت میں آپسی بھائی چارہ اور اتحاد کوزندہ رکھنا ہے‘

مجاہد آزادی کی یاد میں’وطن سماچار گروپ‘ کی طرف سے ’سماجی اتحاد کو یقینی بنا نے کیلئے میڈیا کا کردار ‘ کے عنوان سے سمینار

نئی دہلی، سماج نیوز: گزشتہ روز وطن سماچار گروپ کی جانب سے شہید اشفاق اللہ خان اور رام پرساد بسمل کی یاد میں’ سماجی اتحاد کو یقینی بنا نے کیلئے میڈیا کا کردار ‘ کے عنوان پر ایک سمینار کا انعقاد کیا گیا۔ یہ پروگرام پریس کلب آف انڈیا میں منعقدہوا، جس میں سیاسی،سماجی و ادبی شخصیات نے شرکت کی اوردونوںمجاہدین آزادی کو خراج عقیدت پیش کرتے ہوئے انہیں یاد کیا۔ اس دوران راشٹریہ سہاراکے سینئر سب ایڈیٹر سید مجاہد حسین، ڈاکٹر زبید الرحمان ببن میاں ، فیروزغازی وکیل، نیہاگرگ، محمداکبر، محمدرامش، اسعد صابری، حنیزاخان ، جیوتی یادو، سیدمحمد اصدر علی، شاہد انصاری،وپُل، محمدعلی، ارشیتا، اسرار واقرار احمدبھائونا، رئیس صدیقی، زاہد حسین ودیگر کو ’وطن کے رتن ایوارڈ:2023‘ سے نوازا گیا ۔
اس موقع پر مہمان خصوصی کے طور پرشریک ممتاز صحافی قمر آغا نے عظیم مجاہدآزادی کی خدمات کی ستائش کرتے ہوئے کہاکہ شہید اشفاق اللہ خان اور رام پرساد بسمل دونوں نے ہنستے ہوئے وطن عزیز کے خاطر جام شہادت کو قبول کیا۔انہوںنے کہا کہ اشفاق اللہ اور رام پرساد بسمل ہندوستان کو ایک جمہوری ملک بنانا چاہتے تھے اور ایک ایسے نظام کی بات کرتے تھے جس میں سبھی کو برابری کا حق ملے ۔ انہوں نے موجودہ دور کی صحافت پر روشنی ڈالتے ہوئے کہاکہ موجودہ وقت میں صبر و تحمل کامظاہرہ کر نا چاہئے ،کیو نکہ ہم کثرت میں وحدت کے ملک میںہزاروںسالوں سے پیار ومحبت کے ساتھ رہتے آئے ہیں ،تاہم آج کے نفرتی حالات بھی ختم ہو جائیں گے ، ضروری ہے کہ ہم اپنے آپسی بھائی چارہ اور اتحاد کومضبوطی کے ساتھ زندہ رکھیں ۔

سینئر جر نلسٹ راہُل دیو نے کہاکہ اچھی باتوں کو صرف اسٹیج سے کہنے سے سماج میں کوئی تبدیلی نہیں آئے گی ، بلکہ سماج کی تبدیلی کیلئے ہمیں خود ہی کھڑا ہونا پڑے گا ۔انہوں نے صحافیوں کی ذمہ داریوں پرروشنی ڈالی ،وہیں انہوں نے آپسی اختلافات کو ختم کر نے پر زور دیا ۔ راہل دیو کا کہناتھا کہ اختلافات قدرت کے دین ہے ، لیکن ہمیںموجودہ وقت میں غلط فہمیوں اور جھگڑوں کو دور کر نا ہوگا ،نیز آپسی گفتگو کاراستہ اختیار کرناہوگا،تبھی معاشرہ نفرت سے پاک اور پیار ومحبت والابنے گا ۔
ٹی وی اینکر سمائیرہ خان نے اپنے خطاب میں کہاکہ میڈیا کے سامنے کافی چیلینجز ضرور ہیں ، لیکن سماج کی تبدیلی کیلئے ہمیں خود ہی آگے آناہوگا ۔ انہوں نے مزیدکہاکہ سوشل میڈیاکے اس دور میں مین اسٹریم میڈیا کی بھی اپنی ایک الگ اہمیت ہے ، لیکن ہمیں اپنے سماج کے ذہن کو پاک و صاف پیغام پہنچانا بیحد ضروری ہے،حالانکہ ٹی آر پی کے سبب آج صحافت کہیں نہ کہیں غلط سمت پر کام کررہی ہے ۔بزرگ سماجی خدمتگارڈاکٹر حاجی محمد تاج الدین انصاری نے میڈیا کے کردار کے سلسلے میں گفتگوکی اور کہاکہ میڈیا کارکنان کی ذمہ داری ہے کہ اچھی باتوں کو عام کریںاور بری باتوںکو ختم کریں ، جبکہ موجودہ وقت میںمیڈیاالٹا کام کررہاہے اور آج کے نفرتی ماحول بنانے کیلئے کہیں نہ کہیں میڈیا بھی ذمہ دارہے ۔ صحافی ملن شرما نے کہاکہ موجودہ وقت میں سوشل میڈیا کا رول بہت اہم ہے اور آج ہر شخص میڈیا سے وابستہ ہو گیا ہے، لہٰذاایسے میں معاشرہ کو بہتر بنا نا ہم سب کی ذمہ داری ہے ۔قبل ازیں حافظ غفران کی تلاوت قرآن سے پروگرام کاآغاز ہوا، جبکہ نظامت پروگرام کے کنوینر صوفی مولانامحمداحمدنقشبندی نے کی اورآخر میں اسلم احمد ایڈوکیٹ نے سبھی مہمانوں کا شکریہ اداکیا ۔