مسلمان متحد ہوں اور باطل سے دور رہیں: خطبہ حج

میدان عرفات کی مسجد نمرہ سے خطبہ حج کے دوران شیخ ڈاکٹر یوسف بن محمد بن سعید کا مسلمانوں کے اتحاد پر زور، شیطان مسلمانوں میں تفرقہ چاہتا ہے، اللہ کی رسی کو مضبوطی سے تھام لو، ’’دین میں تمام تعلیمات ہیں جو مسلمانوں کو جوڑ کر رکھتی ہیں، شریعت میں حکم ہے جھگڑا کرنے والوں کو سمجھایا جائے‘‘: شیخ ڈاکٹر یوسف بن محمد بن سعید ،لاکھوں عازمین سمیت دنیا بھر میں موجود مسلمانوں نے ٹی وی پر براہ راست سنا

مسجد نمرہ(عرفات)، سماج نیوز:امام کعبہ ڈاکٹر شیخ حسین بن عبدالعزیز آل الشیخ نے خطبہ حج دیتے ہوئے کہا ہے کہ اللہ کا حکم ہے تمام مسلمان متحد ہو کر رہیں اور تفرقے میں نہ پڑیں۔میدان عرفات کی مسجد نمرہ سے شیخ ڈاکٹر یوسف بن محمد بن سعید نے خطبہ حج دیا جسے لاکھوں عازمین سمیت دنیا بھر میں موجود مسلمانوں نے ٹی وی پر براہ راست سنا۔دنیا بھر سے تشریف لانے والے 25 لاکھ فرزندان توحید حج ادا کر رہے ہیں۔ حج کے دوسرے دن دنیا بھر سے عازمین لبیک اللھم لبیک کی صدائیں بلند کرتے حج کے رکن اعظم وقوف عرفہ کے لیے نماز فجرکی ادائیگی کے بعد میدان عرفات میں جمع ہوئے۔ یہاں شیخ ڈاکٹر یوسف بن محمد نے مسجد نمرہ میں خطبہ حج پیش کیا، جس کا ترجمہ اردو سمیت دنیا کی 20زبانوں میں براہ راست نشر کیا گیا۔ مسجد نمرہ میں سعودی بزرگ علما کونسل کے شیخ یوسف بن سعید حج کا خطبہ دیا اور مسلمانوں کو باطل سے دور رہنے اور متحدہ ہونے کا پیغام دیا۔شیخ محمد یوسف نے خطبہ حج کا آغاز تمام مسلمانوں کو متحد ہونے کے پیغام سے دیتے ہوئے کہا کہ اللہ تعالیٰ نے تفرقہ ڈالنے سے منع کیا ہے اور اس کا حکم ہے کہ تمام مسلمان متحد ہوں۔انہوں نے کہا کہ شیطان چاہتا ہے کہ مسلمانوں میں تفرقہ پیدا ہو۔ مسلمان کیلئے باطل سے دور رہنا لازم ہے اور حج کے اجتماع کا بھی یہ پیغام ہے کہ مسلمان مل جل کر رہیں، مل جل کر رہنے میں رحمت اور الگ الگ رہنے میں مصیبت ہے۔ اتفاق پیدا کرنا معاشرے، خاندان اور ہر فرد کی ذمے داری ہے، اللہ تعالیٰ نے والدین، میاں بیوی اور بچوں کے حقوق واضح کیے ہیں، اگر اختلاف ہو تو ہمیں حکم دیا گیا ہے کہ قرآن و سنت کی طرف جائیں۔ اللہ تعالیٰ نے قرآن مجید میں صبر کی تلقین ہے۔خطبہ حج دیتے ہوئے شیخ ڈاکٹر یوسف بن محمد کا کہنا تھا کہ اے ایمان والو، دنیا اور آخرت کے معاملات میں اللہ کے حکم کو پورا کرو، اللہ تعالی نے تفرقہ ڈالنے سے منع کیا ہے، توحید کی دعوت تمام نبیوں میں مشترک رہی، اللہ ایک ہے اس کے سوا کوئی عبادت کے لائق نہیں، اللہ کے سوا تمام چیزوں کو ختم ہو جانا ہے۔

شیخ یوسف بن محمد کا کہنا تھا کہ نماز ادا کی جائے، زکوٰۃ دی جائے، غریبوں کی مدد کا حکم دیا گیا، حج بھی ارکان اسلام میں سے ایک رکن ہے، اللہ کی عبادت ایسے کرو کہ وہ تمہیں دیکھ رہا ہے، کسی عربی کو عجمی پر اور عجمی کو عربی پر فضیلت حاصل نہیں، جس طرح اس مہینے کی حرمت ہے اسی طرح جان مال کی حرمت ہے، دن رات کا آنا جانا اللہ تعالی کی نشانیاں ہیں، اللہ کی رسی کو مضبوطی سے تھام لو، اللہ کی حدود کی حفاظت کا مطلب ہے کہ ہم صرف اللہ کی عبادت کریں، ہر نبی نے یہی دعوت دی کہ ایک اللہ کی عبادت کرو، نماز، روزہ، زکوٰۃ اور حج کا حکم اللہ نے دیا ہے۔ خطبہ حج دیتے ہوئے شیخ یوسف بن محمد کا کہنا تھا اللہ عظیم ہے اور حکمت والا ہے، اللہ رب العزت نے تفرقے سے منع فرمایا، قرآن میں اتحاد کی اہمیت کو بیان کیا گیا ہے، اتحاد میں ہی دین و دنیا کے معاملات میں فلاح ہے، مسلمانوں کا آپس میں مل کر رہنا ضروری ہے، اللہ نے فرمایا جس نے کتاب میں اختلاف کیا وہ ہدایت سے دور ہیں، مسلمانوں کو آپس میں جڑ کر رہنا ضروری ہے، ہمیں حکم دیا گیا کہ اختلاف ہو جائے تو قرآن اور سنت کی طرف جائیں، قرآن کریم میں مسلمانوں کے لیے جڑ کر رہنے کا حکم ہے۔امام کعبہ کا کہنا تھا کہ اچھے اخلاق سے دوسروں کے دل میں جگہ پیدا ہو جاتی ہے، مسلمانوں کے لیے ضروری ہے اچھے اخلاق رکھیں، شریعت مطہرہ کا مقصد ہے مسلمان آپس میں جڑ جائیں، ارشاد ہوتا ہے شرک نہ کرنا، والدین سے حسن سلوک کرو، گناہ کے کاموں میں تعاون نہ کرو، تقویٰ میں تعاون کرو، شیطان چاہتا ہے مسلمانوں میں تفرقہ پیدا ہو، دین میں تمام تعلیمات ہیں جو مسلمانوں کو جوڑ کر رکھتی ہیں، شریعت میں حکم ہے جھگڑا کرنے والوں کو سمجھایا جائے، ارشاد ہوتا ہے امت واحدہ ہے، اللہ کے حکم پر عمل کرنے والی۔

شیخ محمد یوسف نے مزید کہا کہ مسلمانوں کیلئے ضروری ہے کہ اچھے اخلاق رکھیں، اچھے کام میں تعاون کریں اور گناہوں میں معاونت کرنے سے خود کو بچائیں۔ کوئی تمہارے ساتھ نیکی کرے تو اس کےساتھ بھی نیکی کرو، مسلمان کے لیے اللہ کے حکم کو پورا کرنا اور اس کا خوف اختیار کرنا لازم ہے۔ان کا کہنا تھا کہ حاکمیت اور حقیقی حکمرانی اللہ تعالیٰ کی ذات ہے۔ مسلمانوں کو حکم دیا گیا ہے کہ اللہ کی اطاعت کرو اور حدود اللہ کا خیال رکھو۔ اللہ کی حدود کی حفاظت کا مطلب ہے کہ ہم صرف ایک اللہ کی عبادت کریں۔ اللہ کی عبادت ایسے کرو جیسے اللہ آپ کو دیکھ رہا ہے۔انہوں نے مزید کہا کہ ہر پیغمبر نے آکر یہی دعوت دی کہ اللہ کی بندگی کرو۔ مسلمانوں کو نماز، روزہ، زکوٰۃاور بیت اللہ کے حج کا حکم اللہ نے دیا ہے۔ اللہ کی وحدانیت اور رسولﷺ کی رسالت کی گواہی دینا اسلام ہے۔ حضورﷺ نے فرمایا کسی عربی کو عجمی پر اور عجمی کو عربی پر فوقیت حاصل نہیں۔ حضورﷺ نے فرمایا ایک مسلمان دوسرے مسلمان کیلئے عمارت کی طرح ہے۔ شیخ محمد یوسف نے حجاج کرام کو مخاطب کرتے ہوئے کہا کہ آج کے دن تمام مسلمانوں کیلئے دعائیں کرنا لازم ہے، تمام حجاج اپنی دعاؤں میں لوگوں کو کثرت سے یاد کریں اور خادمین حرمین شریفین کیلئے بھی دعا کریں جنہوں نے یہ انتظامات کیے۔

مناسک حج کے دوران منیٰ کی عارضی خیمہ بستی میں 8 ذوالحجہ کا پورا دن قیام کے دوران پانچوں وقت کی نمازیں ادا کر کے دنیا بھر سے آئے لاکھوں عازمین لبیک اللھم لبیک کی صدائیں بلند کرتے حج کے رکن اعظم وقوف عرفہ کے لئے 9 ذوالحج کو نماز فجرکی ادائیگی کے بعد میدان عرفات میں جمع ہوئے۔ میدان عرفات میں حج کا رکن اعظم وقوف عرفہ ادا ہونے کے بعد حجاج کرام مسجد نمرہ سے خطبہ حج سننے کے بعد ظہر و عصر کی نمازیں یکجا کرکے ایک ساتھ ادا کیں۔ اذان مغرب کے بعد حجاج میدان عرفات سے مزدلفہ روانہ ہوں گے جہاں وہ نماز مغرب اور عشاء ملا کر ادا کریں گے۔ عازمین حج آج رات بھر مزدلفہ میں کھلے آسمان تلے عبادت اور ذکر و اذکار کرتے ہوئے رات گزاریں گے اور شیطان کو مارنے کے لیے کنکریاں جمع کریں گے۔10 ذی الحجہ کو نماز فجر کے بعد مزدلفہ سے واپس منیٰ روانہ ہوں گے اور حضرت ابراہیم کی سنت کی پیروی میں رمی جمرات کریں گے، شیطان کو کنکریاں مارنے کے بعد قربانی کریں گے، قربانی کے بعد حاجی احرام اتار دیں گے اور بال منڈوا کر طواف زیارت کے لیے مسجد الحرام جائیں گے، عازمین حج خانہ کعبہ جا کر طواف زیارت کریں گے اور واپس منیٰ جا کر ایام تشریق گزاریں گے۔اس موقع پر سعودی حکومت کی جانب سے سکیورٹی کے سخت انتظامات کیے گئے ہیں۔انہوں نے خطبے کے اختتام پر دعا کی کہ اللہ تعالیٰ تمام مسلمانوں کی مغفرت فرمائے، ان کے رزق میں برکت عطا فرمائے، شر سے محفوظ رکھے۔خطبہ حج کے بعد مسجد نمرہ میں حجاج ظہر اور عصر کی نماز ایک اذان اور دو تکبیرات کے ساتھ ادا کی۔