وزیر اعظم مودی کی ماں ہیرا بین کا انتقال

نئی دہلی، سماج نیوز: وزیر اعظم نریندر مودی کی ماں ہیرا بین کا آج انتقال ہو گیا۔ انہوں نے صبح 3.30بجے آخری سانس لی۔ وزیر اعظم مودی نے ٹویٹ کرکے ماں کو خراج عقیدت پیش کیا۔ انہوں نے ٹویٹ کیا کہ ’’شاندار صدی خدا کے قدموں میں ٹکی ہوئی ہے… میں نے ہمیشہ ماں میں تثلیث کو محسوس کیا ہے، جس میں ایک سنیاسی کا سفر، ایک بے لوث کرما یوگی کی علامت اور اقدار کے لیے پرعزم زندگی شامل ہے‘‘۔ بتادیں کہ 100 سالہ ہیرا بین احمد آباد کے ایک اسپتال میں زیر علاج تھیں، جمعرات کو ہی گجرات حکومت کی جانب سے یہ اطلاع دی گئی تھی کہ ان کی حالت میں مسلسل بہتری آرہی ہے، انہیں ایک دو دن میں ڈسچارج کیا جاسکتا ہے۔ پی ایم مودی اپنی ماں کو دیکھنے کیلئے احمد آباد کے یو این مہتا اسپتال بھی پہنچے تھے، جہاں ہیرا بین کو داخل کرایا گیا تھا۔ذرائع کے مطابق انہیں سانس لینے میں دشواری اور بلڈ پریشر کی تکلیف کے باعث اسپتال میں داخل کرایا گیا تھا۔ قابل ذکر بات یہ ہے کہ پی ایم مودی کی ماں ہیرا بین وزیر اعظم مودی کے چھوٹے بھائی پنکج مودی کے ساتھ گاندھی نگر شہر کے قریب رئیسان گاؤں میں رہتی تھیں۔ وزیر اعظم باقاعدگی سے رائسن جاتے تھے اور گجرات کے اپنے بیشتر دوروں میں اپنی والدہ کے ساتھ وقت گزارتے تھے۔